Kultura ezberdinen topagune bilakatu da gaurkoan Arrasateko Herriko Plaza, egin duten azoka berezia dela eta. Festetako azken txanpa izanda, gainera, jende ugari animatu da plazara gerturatu eta bertan prestatutako jana eta edana dastatzera. Besteen artean, Galizia, Extremadura, Sahara zein Pakistaneko ohiturez gehiago ikasteko abagunea egon da.
Tokian tokiko elikagaien usain goxoak herritar ugari erakarri du plazara. Olagarroa, enpanada, gazpatxoa zein kus-kusa dastatu dute batzuek eta tearen errituala ezagutu eta probatzeko aukera izan dute besteek. Gasteiztik Herriko Plazako oholtza gainera, sevillanak dantzatzera etorri den taldeak Andaluziako dantzekin girotu dute azoka.
Askotan ezezagunak edo urrutikoak zaizkigun ohitura, elikagai eta orokorrean kulturak gertuko bilakatzeko azoka arrakastatsua izan da beraz, gaurkoa.
Sanjuanen garra guztiz itzali bitartetan herritarrek azken orduak aprobetxatzen jarraituko dute.