Gazte eta heldu, 60 bat lagun erakarri ditu festak, eta 14 lagunek parte hartu dute Skate, Roller, BMX eta Scooter modalitateetan. Mattin Rozas, Mikel Gallacher, Markel Elortza eta Jon Iriondo izan dira irabazleak, hurrenez hurren.
X Kirolen Bideo Lehiaketa
Aste Santuan abiarazi zuten lehiaketa, eta hiru lan aurkeztu dituzte guztira, arrasatearrek eginak eta Arrasaten bertan grabatutakoak; oso lan txukunak, epaimahaikideek kontatu digutenez. Ur Bruñak eraman du lehen saria; Mattin Rozasek, bigarrena; eta Jon Izagak, hirugarrena. Urban festan, sariak banatu eta bideoak proiektatu dituzte.
Graffiti erakustaldia eta saskibaloia
Graffiti erakustaldia ere izan da bariku arratsaldeko festan, Andoni Iñurritegi Potxokoren eskutik. Eta baita Hirunako Saskibaloi Txapelketa ere: "Nesken parte-hartzea bultzatu gura genuen, eta horretarako ideia ona iruditu zitzaigun saskibaloi txapelketa bat antolatzea. Neska-mutilez osatutako bost taldek parte hartu dute eta ondo joan da", kontatu digute Txatxilipurditik.
Udan, ezberdin
Barikuko Urban Festarekin, ikasturtean zehar egindako lana borobildu dute Arrasateko gaztetxokoek. Uztailean udalekuek eta Udaixek hartuko diete erreleboa, eta gaztetxokoetako ateak irail erdi inguruan irekiko dira berriz.