10:00etan hasiko da Txalaparta Festa, ezin bestela izan, eta txalaparta doinuekin: "Goikobaluko gaztelu zaharretik, txalaparta diana batek lau haizetara zabalduko ditu txalaparta doinuak". 11:00etan hasita, berriz, txalaparta jotzeko aukera emango dute Herriko Plazan; lau txalaparta jarriko dituzte horretarako, bi txikiak, umeendakoak. Eta pintxoak eta edariak banatuko dituzte tarte horretan. 13:00etan, berriz, irrintzilariek ere egingo dute saioa bertan, Herriko Plazan. Udalpe elkartean egingo duten herri bazkariarekin borobilduko dute goiza.
Arratsaldean, elkartrukea ingurukoekin
Arratsaldean, berriz, "beste herri batzuetako txalapartariez gozatzeko aukera izango dugu tabernaz tabernako txalaparta saioetan, eta albokariak eta bertsolariak ere hartuko dute parte. Arrasateko txalapartariez gain, Bergara, Aramaixo, Aretxabaleta eta Urretxuko txalapartariak izango ditugu, eta Urretxukoek saio berezia eskainiko dute", iragarri dute antolatzaileek.
20 urte txalaparta doinuak zabaltzen
Ttakun txalaparta taldeak 20 urte daramatza txalaparta kontuak lantzen Arrasaten. 1988. urtean hasi ziren herriko lehen txalapartariak elkartzen, 1993.urtean TTakun txalaparta taldea sortu zuten eta ordutik "jende ugari ibili da txalaparta jotzen, ikasitakoak irakatsiz eta lekukoa gazteagoei utziz", diote Ttakun elkartetik.
Adibide moduan, diote "urtebeteko hutsunearen ostean txalaparta taldeak Arrasateko Udalarekin elkarlanean txalaparta ikastaroa" antolatu zuela hilabetez apirila eta maiatza artean. "15 pertsona baino gehiagok hartu zuten parte, adin eta jatorri ezberdinetakoak, eta txalaparta taldeak balorazio oso positiboa" egin du.
'Ttakunkide'
Bestalde, Ttakun txalaparta taldeak Ttakunkide ekimena abiarazi du "Arrasateko txalapartarien sarea sortu eta osatzeko" helburuarekin. "Taldea handitu eta egonkortzea" da helburua. Gaur egun hamar lagunek osatzen du Ttakun taldea "eta handitzea da helburua".