Flamenko munduan gitarrista ezaguna da Monton, eta Hermosak duela sei urte ezagutu zuen Jerezko Flamenko Jaialdian; ordutik kontzertu ugari eskaini dituzte elkarrekin. "Proiektu honetara gainera, bestetan elkarlanean aritu garen artista batzuk gonbidatu ditugu: Selene Muñoz dantzari daniar-espainiarra, Maria Berasarte fado abeslari donostiarra eta Hodei Lizaso perkusionista hernaniarra, hain zuzen".
Flamenkoa oinarrizko osagai izanda, hori hartu eta beste estiloekin nahastuta, proiektu interesgarria jarraitzeko aukera egongo da bihar Arrasaten: "Ez zaizkit sekula etiketak gustatu, momentu bakoitzean nahi izan dudana egin dut, musikan askatasuna oso garrantzitsua baita. Hori bai, akordeoiarekin espero ez diren musikak egiten ahalegindu naiz beti".
Euskal kutsuko lana
Urretxuarraren esanetan, sarri galdetu izan diote euskal musika eta flamenkoa uztartzearen ideia nola sortu zen. "Oso gauza naturala dela esango nuke. Jose Luisek flamenkoa egiten du eta ni euskalduna naiz, ez dago misterio handirik. Bion arteko espazio komunak euskal kutsua eduki behar zuela iruditzen zitzaidan".
Horren adibide moduan, ikus-entzuleek flamenkoa euskaraz ere egin daitekeela ikusiko dute bihar Amaian: "Euskarazko kantu bat ere badaukagu, Lau Haizetara".