Barneak husteko modu aproposa izaten da barre egitea eta komikoen lanak asko errazten du aurpegiko giharrak funtzionamenduan ipintzean. Hala, terapian laguntzeko eta une atsegina pasarazteko lanetan hutsik egingo ez duen aurpegi ezagun batek bisitatuko du Arrasate ekainaren 29an. Leo Harlem umorista ekainaren 29an Arrasateko Amaia antzokian izango da bere azken ikuskizunarekin publikoari algara ateratzen.
Hain zuzen ere, Madrilen maiatzean aurkeztu zuen ¿Qué hay de nuevo? lan berria ekarriko du Arrasatera. Harlem, baina, ez da bakarrik egongo, umorean aditua den Sergio Olalla edukiko baitu alboan.
Sarrerak 24 eurotan
Nahiz eta sarrerak apiril amaieran ipini zituzten salgai, oraindik ere dezente geratzen direla adierazi dute.
Prezio bakarra zehaztu dute Harlem eta Olallaren ikuskizunerako, 24 euro. Gura dutenek Internet bitartez eros ditzakete sarrerak, http://www.kutxasarrerak.net atarian.