Gaur irekiko ditu ateak 15. Garagardo Azokak. Irekiera egunean, iaz egin moduan, Mondragon Unibertsitatearekin elkarlanean, herri kirolak egingo dira (18:30): sokatira, zaku-lasterketa, txingak eta artaburuen bilketa. Talde bakoitzak zortzi kide izango ditu eta izena emateko aukera egongo da egunean bertan.
ART-eko Joseba Maidaganek azaldu digu zergatik erabaki duten ekintza errepikatzea: "Iaz harrera ona izan zuen eta interesgarria da guretako unibertsitateko ikasleek ere Garagardo Azokan parte hartzea. Modu kurioso bat da azokarekin hasteko". Hainbat sari banatuko dira, eta txapeldun geratzen den taldeak afaria irabaziko du. Egun horretan pintxo-garagardoa izena jarri dioten ekimena egingo dute: 18:30etik 21:00etara, gura duenak euro baten truke garagardo botila izango du eskuragai, eta horrekin batera saltxitxa pintxoa.
Eguenean itxita, grebagatik
Irekiera ofiziala, baina, Udaleko ordezkariek egingo dute, 20:30ean; ARTeko kide eta ekimenaren babesle guztiekin batera karpan afalduko dute. Musika ez da faltako, eta gauerdira arte eskaintza berezia egongo da: lehen garagardo pitxarra lau euroren truke, eta bigarrena hiru eurotan. Eguenean, berriz, greba orokorrerako deia dela-eta, azoka itxita egongo da eta egubakoitzean irekiko ditu ateak berriro, 18:30ean. Gauerdira arte ohiko menuak zerbitzatuko dituzte: txerri ukondoa, saltxitxa eta oilaskoa. Zuzeneko emanaldirik ez da egongo, baina musikarik ez da faltako. Zapaturako plana berbera izango da.
Bestalde, duela bi urte eman ziren lapurretengatik segurtasun zerbitzua kontratatu dute: "Ez da gure gustukoa halako neurriak hartu behar izatea, baina ez dugu orduko gertaera errepikatzerik nahi", dio Maidaganek.
15. Zazpinako Txapelketa
Zapatua izango da Garagardo Azokako egunik potoloena, egun horretan jokatuko da-eta 15. Nazioarteko Zazpinako Errugbi txapelketa.
Aurrekoetan bezala, partiduak Mojategin izango dira, 15:00etan hasita. Maidaganek aurreratu duenez, gizonezkoez osatutako "sei edo zazpi" talde eta emakumezkoez osatutako beste "bi edo hiru" izango dira aurten. Talde bakoitzean 12 jokalari izango dira. Sari banaketa zapatuan egingo da karpan, 21:00etan. Eta noski, urtero moduan, parte hartzaile guztiek elkarrekin afalduko dute bertan.