Iñaki Etxezarretak hartuko dio lekukoa Txaro Iraetari Arizmendiren zuzendaritzan

Iñaki Etxezarreta urretxuarra izango da Arizmendi Ikastolako zuzendari berria. Gaur goizean aurkeztu dute hedabideen aurrean. Etxezarretak urte askoan Ikastolen elkartean egin du lan eta oso gertutik ezagutzen du Arizmendi ikastolaren izaera berezi eta erreferentziala. Txaro Iraetaren lanari eta ikastolaren identitate definituari eutsiko diola azpimarratu du zuzendari berriak.

Irailaren 1ean hartuko du kargu berria Iñaki Etxezarretak; 2003tik zuzendari izan den Txaro Iraetaren eskutik.
Euskal Herriko ikastolarik handienaren zuzendaria izango da Iñaki Etxezarreta, 3.000 ikasle inguru dituena, 300 langile eta 1.600 familia baino gehiago partaide dituena.
2001an hasi zen Arrasate, Aretxabaleta eta Eskoriatzako ikastolen bategitearen osteko bigarren fase baten hartuko du Etxezarretak kargua eta  Arizmendi Ikastolak egin duen bide bereziari eusteko konpromisoarekin hartuko du kargu berria. Ikastolen Elkartean zegoenetik, harreman estua izan du Arizmendikoekin.

Urretxuarra da eta 19 urterekin hasi zen haren herriko ikastolan lanean. 24 urterekin Urretxuko ikastolako zuzendari egin zuten eta 32 urterekin Gipuzkoako Ikastolen Elkartera joan zen, handik Euskal Herriko Ikastolen Elkartearen sorreran murgiltzeko. 2010etik Elkar argitaletxearekin batera euskal curriculuma garatzeko eskola materialarekin  lanean ibili da.

Gaur aurkeztu dute zuzendari berria izango dena, Txaro Iraeta, honezkero jarduneko  zuzendariarekin, eta Andoni Mujika ikastolako lehendakariarekin batera.
Iraetak nabarmendu du identitate definitua eta alor ekonomikoan saneatua dagoen ikastola utziko duela. Erronka horri helduko dio, esan moduan, Iñaki Etxezarretak. Zuzendaritzako taldeari dagokionez, ekainean zehar aurkeztuko dute, bai izenak  zein egitura bera.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.