Paco Gartzia: "Gurea sufrimenduaren memoria da; ETArena, isiltasunean oinarritutako koldarkeriarena"

Paco Gartzia Arrasateko PSE-EEko idazkari nagusia "minduta" dago Bilduk Arrasateko sozialistei egindako azken eskaerak direla-eta. Gartziak prentsa ohar bidez honakoa gogoratu dio Bilduri: "Sozialistak bakearen alde bizitza emateraino heldu dira. Guk ez genuen ezer egin indarkeriaren alde, alderantziz: ETAren aurka borrokatu genuen". Gartzia "konbentzituta" dago herri honen etorkizuna terrorismo bakoa izango dela, "baina ez memoria gabekoa". Era berean, Gartziak euskal presoei "berrazterketa kritikoa" egin eta publikoki barkamena eskatzeaz gain, argitu gabe jarraitzen duten 326 krimenetan laguntzeko eskatu die.

Gartziak honakoa gaineratu du, besteak beste: "ETA ez zen historiaren ezbehar bat izan eta gertatu izanak ez du esan nahi saihestezina zenik. Gertatu zena gertatu zen talde terrorista batek erailtzeko, mehatxatzeko, hertsatzeko eta gizon zein emakume batzuen irudia desitxuratzeko erabakia hartu zuelako. Gizon eta emakume horien errua izan da sozialistak, kazetariak, epaileak eta politikariak izatea".

Zauriak, "zabalik oraindik"

Era berean, zauriak itxi gabe jarraitzen dutela dio sozialista arrasatearrak: "Zauriak oraindik zabalik daude familien, lagunen eta alderdikideen artean eta hala egon beharko lirateke euskal gizartean, osotasunean. Zauri horien tratamendu bakarra da memoria eta egia, eta gero justizia, iraganaren eta etorkizunaren arteko zubia eraikitzeko".

Memoria ulertzeko modu ezberdinak

Memoriaren gainean honakoa adierazi du Gartziak: "Gurea sufrimenduaren memoria da; ETArena, isiltasunean oinarritutako koldarkeriarena. ETAko presoak pistola edo bonbak erabili zituzten hiltzaileak dira, gizon eta emakume arbuiagarriak".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.