Aurten lau hitzaldi antolatu dituzte eta udaletxeko osoko bilkuren aretoan eta kulturateko areto nagusian jende ugari batu da: "Hitzaldiek oso harrera ona izan dute eta jende ugari etorri da hauek entzutera", zioen Xabier Zubizarretak, Zuztarrak Errotuz taldeko kideak.
Historiak jendetzarik erakartzen ez duela jakin arren, joera horri buelta ematen jakin dute: "Jendeak ulertu du gure historia guk kontatzeak zelako garrantzia duen".
Historia, irabazle kontua
Zubizarretak argi dauka: "Historia irabazleek bakarrik kontatu dute". Euskal Herriaren kasuan, baina, ñabardura bat gehitu nahi izan du: "Guk izan ezik, beste guztiek kontatu dute gure historia". Hori apurtzeko asmoarekin sortu zuten zikloa. Hala ere, dogmetatik urrun, izaera askotariko historialariak gonbidatu dituzte: "Ikuspuntu ezberdinetako ikertzaileak ekartzen saiatu gara".
Hitzaldi guztien bukaeran, gainera, solasaldi eta galderendako tokia utzi dute, bakoitzak jaso duenaren inguruan hitz egin ahal izateko. Oraindik goiz da hurrengo urteko zikloari buruz hitz egiteko, baina, Zubizarretak aurreratu duenez, "gai bakarrean" zentratuko dira.