Taldeak Bideragarritasun Plan bat diseinatu du bere egitura etxetresna elektrikoen sektorearen errealitate berrira egokitzeko, azken bost urteetan sektoreak %56ko beherakada izan baitu. Plan horren ardatza da 2013an barne merkatuak izan duen jaitsiera nazioarteko merkatuarekin konpentsatzea, merkatu horietan %10 haziz.
Erabaki horrekin, "kooperatibistek Mondragoneko ereduari leial izaten jarraitzen dute, elkartasuna eta lankidetza, egungoaren moduko krisi egoeretan bereziki eraginkorrak izan diren printzipioak, oinarri izanik", esan du Korporazioak.
Berregituratze eta Enplegu Sozietariorako Fondoa (BESF), 70 milioi eurokoa, Fagorrek 2013-2016 aldirako diseinatu duen Plan Estrategikoan zehazten den berregituratzerako erabiliko da; izan ere, plan horretan konpainia "errealitate berrira egokitu beharra" planteatzen da, "etxe sektoreko merkatuaren gainbeherak eta kanpo merkatuetako dinamismo handiagoak markatuta dagoen errealitatera, alegia".
%37 gutxiago saldu dute
Mondragonek onartu du krisiak "modu dramatikoan" egin diola "eraso" etxetresna elektrikoen sektoreari, eta horrek sektoreak azken bost urteetan %56 behera egitea ekarri du. Fagorren kasuan, salmentak %37 gutxitu dira aldi horretan, 600 milioi euro.
Fagor Etxetresnek neurriak hartu dituzte azken urteetan, lana egokitzeko eta egitura gastuak murrizteko neurriak, hain zuzen, eta 78 milioi euro aurreztea lortu dute. "Halere, krisia hain gogorra da eta suspertzeko aukerak hain urrun daude, egindako egokitzapenak ez dira nahikoa izan, eta beste neurri batzuk planteatzeko beharra dago", esan du Mondragon Korporazioak. Neurri horietako bat da 70 milioiko fondoa sortzea.