Geratzen diren lau saioetan, ikasturte osoan egin duten moduan, askotarikoa izango da eskaintza.Maiatzaren 9an antzerkia izango da protagonista: Publikoari Gorroto antzezlana eskainiko du Ander Lipusek. Antzerkiari buruzko hausnarketa jostalari baten moduan hasten da obra, publikoarekiko keinuz eta umorez.Pixkanaka, ordea, arimaren barrunbe ilunenak joango dira agertzen: krudelkeria, bortxa, botere-harremanak... Giza izatearen amildegi ertzera iristeko asmoz dator aktorea. Lipus da eta beraz, ikuskizuna bermatuta dago.
Australiako aborigenen doinuak hilaren 16an
Maiatzaren 16an, Ibai Nikolai musikari berezia igoko da gaztetxeko agertokira: Australiako aborigenekin bizi eta gero, didgeridooa gainean zeramala Europa zeharkatu zuen. Orain, bere laugarren eta azken lana aurkeztera dator, haren ibilbideko lanik pertsonalena eta ausartena.
Hilaren 23rako The Capaces taldearen kontzertua lotu dute antolatzaileek. Bartzelonatik datoz eta Europako punk-rock talderik onenen artean kokatzen dute adituek. 1998an sortu zen taldea eta beraz, eskarmenturik ez zaie falta.
Fiachras hirugarren ikasturtea amaitzeko
Hilaren 30ean, greba deialdia dela-eta, ez da emanaldirik egongo. Ikasturtearekin amaitzeko, ekainaren 6an, Fiachras taldeak joko du. Lazkaoko Haritz Artola, Bergarako Aitor Aldanondo eta konpainia Sumision City Blues taldearekin batera single-a kaleratu berri datozela igoko dira agertokira. Folka, rocka eta beste hainbat doinu; baina, batez ere, hitzei eta ahotsari garrantzia berezia ematen dioten kantuak.