Klasikoak, hasteko
Dvorák eta Beethovenen klasikoek eta Jose Olaizola Gabarainen Sorgineta suiteak osatuko dute herriko bi musika talde handiek elkarrekin egingo duten saioa. 20:00etan izango da, gaur, San Frantziskon.
Erdi Aroko sonoritatea
Bihar, ostera, Musikaldia barren barrenean sartuko da Erdi Aroko sonoritateetan. Axabeba laukoteak zanfoña, organetoa, lautea, txirula bikoitza, gaita, txirimia... erabiltzen ditu. Izena bezain itxura arraroko instrumentuak guztiak, jatorrizko XIII. eta XIV. mendeetakoetan oinarritutakoak. Ad Trepudium Rotundum izeneko sortan mende horietako izkribuetan jasotako tenpluetarako musika eta dantzak joko dituzte. Zapatuan 20:00etan joko du laukoteak parrokian.
Barrokoari bizia emanez
Azkenik, domekan 20:00etan Ensemble Diatessaron taldeak antzinako musika emanaldia egingo du eta Barroko garaiko interpretazio garaikidea ekarriko dute Udaberriko Musikaldira, historiari bizia emanez.