"Ez genuen uste horrenbeste kostako zitzaigunik, pentsatzen genuelako Realak erdiko postuetan amaituko zuela denboraldia, eta sasoi honetarako lasaiago ibiliko zirela. Baina, Europan egoteko borrokan dabiltzanez zaildu egin da dena", argitu du.
Real europarra, Arrasaten
Hala, gauzak ondo bidean, Europan jokatuko duen Reala izango dugu uztailaren 5ean (egubakoitza) Arrasaten, eta hain zuzen, txuri-urdinendako denboraldi hasiera izango da: "Realekoek uztailaren 1ean hasiko dituzte entrenamenduak, eta handik egun gutxitara izango ditugu Mojategin. Mondrako jokalariak oporretan izango dira ordurako, baina asmoa da herriko jokalariek hainbat entrenamendu saio egitea partidu txukuna ikusi ahal izateko". Bi talde horien artean dagoen aldeaz galdetuta, Laspiurrek garbi dauka Realaren helburua ez dela sekulako errepasoa ematea, eta bai jai batean parte-hartzea: "Asmoa da arrasatearrak Mojategira gerturatzea. Oraindik ezin dugu partiduaren ordua zehaztu, baina 19:00ak inguruan izatea nahiko genuke, jendea denboraz ibil dadin"..
Egitarau potoloa gertu
Garbi dago Realaren bisita izango dela Mondraren 100. urteurreneko ekitaldi potoloa, baina ez da bakarra izango, ezta gutxiago ere (egunak zehaztea falta da). Esaterako, maiatzaren 16an Iñaki de Mujika irrati esataria izango da Kulturaten, hainbat jokalari ohirekin irratsaioa egiten. Horrekin batera, Mondrako beteranoen eta emakumezkoen lagunarteko torneoak ere prestatzen dabiltza, eta beste nobedade bat da San Juanetako danborradan Mondrak izango duen protagonismoa, taldekide izandakoek konpartsa osatuko dutelako.