Herritar talde bat direla azpimarratu du Ane Arregi herritarrak: "Ez gara plataforma bat, herritar talde bat baizik, denok batera erantzun beharraren sentipena dugu".
Lau aldarrikapen
Lau dira euren aldarrikapenak. Alde batetik, hauxe diote: "Krisi hau ez dugu guk sortu eta ez dugu guk ordainduko; politikari ustelak, bankuen egoera, etxe kaleratzeak... herritarron diruarekin jolasten dute". Bestetik, publikoa dena defendatzeko eskatzen dute; "hezkuntza sistema publikoa nahi dugu, osasun zerbitzu on eta publikoa, eta pentsio duinak" aldarrikatu dute. Eraso sozialei erantzuteko herritarrak batzeko deia ere luzatu dute eta gaineratu dute "denoi eragiten digula" lan munduan sartzeko arazoak, murrizketak, kaleratze libreak... Amaitzeko, babesleku soziala sortzeko aldarrikapena ere egin dute eta esan dute aurreko hiru aldarrikapenak batuta, derrigorrezkoa ikusten dutela "elkargune zabal bat sortzea gure aldarrikapenak bat egiteko eta guztion artean erasoen aurrean babeslekua eskaintzeko".
Elkarretaratzeak maiatzaren 2tik aurrera
Hala, esan dute elkarretaratzeak egingo dituztela hileko lehen eguenetan 19:00etan Portaloian ordu erdiz. Lehenengoa maiatzaren 2an izango da.