Real Union ez zen denboraldi amaiera lasaiko partidua jokatzera etorri –talde batzuk amaitutzat eman dute urtea. Irungoek ez dute aurreko postuen borrokako protagonismoa Oiartzuni eta Hernaniri bakarrik eman nahi, eta aurrekoen lehia horretatik bost puntura badaude ere, besteen akats baten zain daude, ostera ere multzoan sartzeko.
Mondra, ostera, etorkizuna korapilatzen dabil. Badirudi Tolosan jaso zuten errepasoa ez dutela ahaztu (4-0), nahiz eta tartean Aste Santuko oporraldia izan duten. Mojategiko berdegunera lasai irten ziren, edo ez mailari eusteko borrokan dabilen talde batek izan behar duen amorruaz. Eta hori da Real Unionen aurrean Mondrak izan dezakeen aldeko puntu bakarretakoa, gaur gaurkoz futbolean kanpotarrak gehiago zirelako.
Lehenengo gola, oparia
Partiduko lehenengo gola baloi geldiko jokaldi batean etorri zen. Eta gauza bat da estrategia jokaldian gola jasotzea –entrenatzaileak amorratzen dituen kontu bat da hori– eta beste bat Mondrak jaso zuen gola jasotzea. Diogun moduan, falta atera eta bigarren lerroan bakarrik zegoen Real Unioneko jokalariak egin zuen 1-0ekoa. Baina ez buruz, hankaz sartu zuen gola; markaketan huts nabarmena, horrenbestez.
Eta gol horretatik Mondra ez zen errekuperatu, lehenengo zatiari dagokionez ez, behintzat. Hala, 35. minutuan penaltiz egin zuen Real Unionek 2-0ekoa. Egindakoa apartekoa izan barik, etekin ederra.
Bigarrenean hobeto
Egiten zuen beroaz itota, Iturrinok hainbat aldaketa egin zituen freskotasuna bilatu nahian. Real Unionek partidua borobilduta zuen, eta Mondra gol bila zebilen. Zaitegik izan zuen aukera onena atezain aurrean bakarrik geratuta, baina loratutako baloia atepetik atera zuen atzelariak. Buruz hainbat gol-aukera garbi izan ostean, Irungoek lortu zuten 3. gola; eurek bai, baloia loratuta.