Pozez zoratzen dago Mari Jose Gil atleta arrasatearra joan den asteburuan lortu dituen emaitzekin. Eta ez da gutxiagotarako. Izan ere, bi domina eskuetan zituela bueltatu zen etxera Donostialdeatik.
Brontzea eta zilarra
Lehen domina egubakoitzean irabazi zuen, Anoetako belodromoan jokatu ziren Europako atletismo txapelketan. "Izugarrizko maila egon da txapelketa horretan. Bi alemaniarrekin batera sartu nintzen helmugara, bigarrenarengatik oso denbora gutxira. Ez nuen espero hirugarren sailkatzea, eta oso pozik nago", adierazi du Gilek.
Bigarren domina, zilarrezkoa, domekan eskuratu zuen Lasarten egindako krosean. "Lasterketan zehar birritan entzun nien ezagunei bigarren nindoala esaten, baina ez nien kasurik egin. Abuztuan operatu nindutenetik, minak izaten ditut sarri, eta ez nuen inondik inora espero hain postu ona lortzea", azaldu du Mari Jose Gilek pozik. "Laster Euskadiko txapelketa jokatuko da, eta ekainean, Gasteizen, Espainiakoa, eta biak prestatzen dihardut", gaineratu du pozez 72 urte dituen korrikalari arrasatearrak.