Pasa den asteburuan, jolastu, eskulanak egin, pultserak… eta Korrikaz ere gogoratu ziren, eta badatorrela ospatu nahian, kartel dotore bat egin zuten San Andresko ludoteka ibiltarian, argazkiak erakusten duen moduan. Eta duda barik, oraingo asteburuan ere izango dute zerekin bete goizeko denboratxo hori San Andres auzoan. Gonbitea, beraz, eginda dago.
Ludoteka ibiltaria, zortzi asteburutan
Txatxilipurdi elkarteak auzoz auzo lantzen duen ekimena da ludoteka ibiltaria. Helburua da ludotekarik ez dagoen auzoetan ludotekaz gozatzeko aukera ematea bertako haur, gazte eta gurasoei. Aurten, zortzi asteburutan (oraingo honekin) eraman dute ludoteka zerbitzua auzoetara.
Udaleku irekiak
Orain, berriz, ludoteka ibiltariari amaiera eman, eta udaberriarekin batera, Txatxilipurdi elkartea dagoeneko udara begira jarri eta udaleku irekiak lantzen dabil. Bihar (eguaztena) jakinaraziko dituzte aurtengo edizioaren nondik norakoak.