Ez da prozesu erraza izan, Zukgua prozesutik sortutako gazte erakunde berria da Ernai. Antolatzaileek emandako datuen arabera 189 herritan 2500 gazteren gogoetetatik sortu da Ernai. Prozesu honen azken helburua independentzia eta sozialismoa erdiesteko gazte estrategia definitu eta hau garatuko duen antolakundea gorpuztea izango da, kapitalismoa baztertuz eta feminismoa bultzatuz.
Gazte danbada
Gazte topagunearen testigua hartuko duen ekimena izan arren, berau baino sakonagoa izango da. Gainera Ernai gazte antolakundearen jaiotza jaialdia izango da. Martxoaren 29, 30, 31 eta apirilaren 1ean, gazteak elkartu eta auzolanean eztabaidatu, gozatu, ikasi, elkartrukatu eta sortzeko aukera izango dute.
Besteak beste, tailerrak, hitzaldiak, mahai inguruak, antzerkiak, kale animazioa eta kontzertuak aurkituko ditugu bertan. Guztia, Ernaik hasi berri duen eztabaida eta hausnarketa prozesua aberasteko.