Maite Iturbe EiTBren zuzendari nagusiak erakunde publikoaren kudeaketa "zorrotza" izango dela aurreratu du, aurreko legegintzaldietan baino "baliabide askoz gutxiago" izango dituztelako. Nolanahi ere, ez dela "aldaketa dramatikorik" egongo eta ez duela ezer "itxiko" gaineratu du.
Aldeko 43 boto; kontrako, 22
Eusko Legebiltzarrean egin du agerraldia Iturbek, EAJren eta PSE-EEren babesarekin Ganberako osoko bilkurak EiTBren zuzendari nagusi izendatu eta gero. EAJk eta PSE-EEk alde bozkatu dute (43 boto); EH Bilduk eta UPDk, aurka (22); eta PP abstenitu egin da. EiTBko zuzendari nagusi berriak datozen lau urteetan aurrera eramango duen proiektua ez dutela ezagutzen argudiatu dute kontra bozkatu dutenek. Gaurko legebiltzarreko tramitea igarotzea besterik ez zitzaion falta irrati eta telebista publikoko zuzendari nagusia izateko.
Astelehenean batzartuko da Administrazio Kontseilua
Zuzendari berriak azaldu duenez, bere lehentasunak euskarazko kanalak indartzea, albistegiek "independenteak eta profesionalak" izaten jarraitzea eta entretenimendu modu berriak topatzea izango dira.
Iturbek ez du zehaztu nolakoa izango den EiTBren aurrekontuen murrizketa, ezta nortzuk izendatuko dituen zuzendaritzan ere, informazio hori EiTBko Administrazio Kontseiluari eman nahi diolako, lehenik eta behin; Administrazio Kontseilua astelehenean batzartuko da.
