2008ko martxoaren 7an hil zuten Arrasatekoa. Lanera joateko etxetik irten eta autora sartu berri zenean tirokatu zuten ETAko kideek; hiru bala jaso zituen etxe atarian, senitartekoen aurrean. Eguerdiko ordu bietarako minutu gutxi batzuen faltan ingresatu zuten Arrasateko Ospitalean, baina ezin izan zuten ezer egin, berehala hil zen.
Eragina hauteskundeetan
Espainiako Gorteetarako hauteskunde kanpainan gertatu zen erailketa, botoa ematera joateko bi egunen faltan. Gertaeraren ondorioz, alderdi politiko guztiek bertan behera utzi zituzten hauteskunde-hitzordu guztiak. Hauteskundeetan Zapatero atera zen garaile eta sozialistek boto zaparrada lortu zuten, Arrasaten, Debagoienean eta EAEko hiru lurraldeetan lehen indarra izateraino.
Zinegotzi Arrasaten
Carrascok AP-1ean egiten zuen lan, Bidelanerako, Bergara hegoaldeko ordainlekuan. 2003ko ekainetik 2007ko maiatzera arte izan zen zinegotzi Arrasaten. 2007ko Udal hauteskundeetan seigarren postuan aurkeztu zen Arrasateko sozialisten zerrendan; ez zuen zinegotzi kargua lortu.
Isaias Carrascok 42 urte zituen eta hiru seme-alaba: Sandra, Ainara eta Hadei.
Ondorioak
Atentatuak zirrara sortu zuen Arrasaten eta euskal jendarte osoan, oro har; eta 2008ko hauteskundeetan eragin zuzena izateaz gain, ondorioak izan zituen Arrasateko Udalaren eta udalbatzaren ondorengo jardunean ere. Mozio etiko istilutsu eta mediatikoak eztabaidatu ziren Arrasaten ez ezik gainerako herrietan ere.
Ino Galparsoro alkateak kartzelan eman zuen epealdi bat atentatua ez gaitzestearren.