EAJk proposatu du Iturbe eta PSE-EEk onartu egin du hautagaia. Baina Legebiltzarrak onartu beharko du orain. Jaurlaritzak erabateko gehiengoa ziurtatuta dauka, EAJ eta PSE-EEren botoekin. Martitzeneko Gobernu Kontseiluan onartuko du Eusko Jaurlaritzak Maite Iturbe EITB taldea zuzentzeko.
Maite Iturbe Mendialdua (1959) bere jaioterrian, Mondragoen, bizi da gaur egun. Ezkonduta dago eta hiru seme ditu. Enpresa Zientzietan lizentziaduna da. Ikasketak egin zituen Oñatin, ETEOn (gaur egin Enpresagintza), lehenengo, eta EHUn, ondoren. Enpresen Zuzendaritza eta Administraritzan masterra dauka.
1981 eta 1984 artean Eusko Jaurlaritzan jardun zuen. Euskara sailburuordetzan, lehenbizi, eta Hezkuntza sailean, ostean.
1984an sartu zen, oposizio bidez, EITB taldean eta 1991tik da Produkzio zuzendaria. Urte hauetan guztietan, batik bat produkzioaren alorrean jardun du EITBn.
Beste arrasatear bat EITBren Administrazio Kontseiluan
Beste arrasatear bat, Edorta Arana, EITBren Administrazio Kontseiluko kide izango da LABek proposatuta. Edorta Arana, EHUko irakaslea da Kazetaritza fakultatean, Leioan, eta, horretaz gain, Goienako Errektore Kontseiluko kidea ere bada. EITBren sorreran kazetari jardundakoa da. Gaur egun Leintz Gatzagan bizi da.