Errusiar ipuin tradizional bat oinarri duen Sergei Prokofievek idatzitako partitura abiapuntu hartuta prestatutako ikuskizuna izan da gaur eguerdian Arrasate Musikalek Amaia Antzokian eskaini duena. Julu Lopezek ipuina hitzez kontatu duen bitartean, Arrasate Musikalekoek musikarekin irudikatu dituzte ipuineko pertsonaiak. Hala, pertsonaia bakoitzak bere doinua eta instrumentua izan ditu: Pedro, esaterako, klarineteen doinu alaiek interpretatu dute; otsoa, aldiz, tronpa, tronboi eta tronpetek.
Marrazkilaria zuzenean
Arestian esan bezala, musika eta hitzei marrazketa ere batu zaie: Oier Balbas gazteak ipuinean kontatutakoak jaso ditu marrazkitan, eta ikusleek antzokiko pantaila erraldoian jarraitu ahal izan dituzte marrazkiok. "Ez da lan erreza marrazkiak egin eta era berean partitura jarraitzea, eta urduri nengoen horregatik, baina azkenean gustura geratu naiz" esan du behin lana amaitutakoan margolari gazteak.
Ikuskizunak izandako arrakasta ikusita, Arrasate Musikalekoak ere pozik egoteko moduan daude.