II. Auzoko Baserri arteko Patata Tortilla Lehiaketa jokatu dute. Elkartera eraman dituzte patata tortillak, 12:00etarako, etxean prestatuta. Sei baserrik parte hartu dute eta epaimahaiak erabaki du Txosa baserrikoek egin dutela onena. Lau auzotarrek egin dituzte epaile lanak eta denak onak zeudela zioten arren, diferentziak ere sumatu dituztela kontatu digute. Behin sariak banatuta, guztien artean jan dituzte, lehen postuan geratu denetik hasita.
Gaur arratsaldean umeen txanda izango da: gazte eta umeentzako jolasak izango dira, 16:00etan; eta Gorritiren animaliak eta txokolatada, 17:00etatik aurrera. Ume eta guraso, dezente jende espero dute.
Gauerako auzo afaria (21:00), erromeria Orots taldearekin (23:30) eta txerri harrapaketa (01:00) antolatu dituzte. Bihar, domeka, meza egongo da San Baleixoko ermitan, Gesalibar eta Garagartzako koruekin, 11:00etan; eta dantzak, Txikitxu Arrostaitz dantza taldearekin, eta musika, trikitilarien eskutik, 11:30etik aurrera.