Maiatz erdialdean, San Andresko jaiak amaitu ostean, izendatu zuten Jon Barriocanal (Arrasate, 1978) auzoko alkate. San Andres eguna dela-eta egitarau zabala prestatu dute: "Adin eta gustu guztiendako egitaraua prestatu dugu", dio. Nobedade nagusia da 80 urtetik gorakoen omenezko bazkaria; auzoko jaietan ez zen egin eta San Andres egunerako atzeratu zuten.
Jaiaren helburua argia da: "Auzoari bizitasuna eman gura diogu, hori da helburu nagusia". Gudarien plazan egingo den azoka izango da egitarauko izarra.
Azokan 20 postu egongo dira
Kanpoko zein bertako produktuak egongo dira, izan ere, herriko estremadurarrek, andaluziarrek eta galiziarrek asistentzia bermatu dute. Eurekin batera, hileko hirugarren zapatuko azokan parte hartzen duten baserritar batzuk ere egongo dira eta baita Aramaioko sagardogileak ere. Artisauak ere ez dira faltako, eta antolatzaileak azken bi azoketan taloak egiten egon diren Ekin emakumeak elkartekoen erantzunaren zain daude. Guztira 20 bat postu espero dira.
80 urtetik gorakoei omenaldia
Esandako moduan, nobedade nagusia da 80 urtetik gorakoen omenezko bazkaria. Normalean auzoko jaietan egiten dute baina aurten jaiak antolatzerako orduan arazo batzuk izan ziren –besteak beste, auzo alkatea izendatu barik zegoen orduan–, San Andres egunerako atzeratzea erabaki zuten.
San Andresen erroldatuta dauden 80 urtetik gorako guztiak daude gonbidatuta; gizonezko zaharrenari txapela oparituko diote eta emakume edadetuenari, aldiz, zapia. Gainerakoek termo bat jasoko dute opari. "40 lagun elkartzea espero dugu gutxienez", adierazi du Barriocanalek.
Egitaraua
egubakoitza, hilak 30
17:00 Etxafuegoak.
17:00-18:30 Guraso eta haurren arteko olinpiada gazte txokoan.
19:00 Txistulariekin poteoa.
zapatua, abenduak 1
10:00 San Andres ferixie Gudarien plazan.
12:00 Goikobalurekin poteoa.
14:00 80 urtetik gorakoen omenezko bazkaria Corazon de Encina elkartean.
19:00 Patata-tortila lehiaketa Gudarien plazan
22:30 Kontzertua Gudarien plazan: La Txusma eta Bitter Honey.