Talde nafarrak Donostiako Amara auzoan duen egoitzan aurkeztu du gaur Velasco. Aurkezpenean, arrasatearrarekin batera, klubeko presidentea Floren Esquisabel eta Eugenio Goikoetxea kirol zuzendaria izan dira.
Velascok Euskaltel-Euskadi taldetik kanpo hasiko duen ibilbide berrian, Caja Rural taldeak lehiatzeko duen era nabarmendu du. Izan ere, talde nafarrean ez du beste txirrindularientzako lanik egin beharko eta askeago ibiltzeko aukera izango du.
Caja Ruralek 2013. denboraldian 16 txirrindulariz osatutako taldea izango du eta horietatik sei berriak izango dira: Euskaltel-Euskaditik etorritako Iban Velasco eta Amets Txurruka, Movistar Team-eko David Arroyo, Orbeako Omar Fraile, Androni-Giocattoliko Francisco Moreno eta taldearen harrobitik ateratako Ruben Fernandez.