Azekeneko urteotan San Mamesen jokatu du Euskal Selekzioak urteroko futbol partidua Gabonetan. Aurten, ordea, Anoetan izango da, abenduaren 29an, eta, litekeena da, gainera, Xabier Azkargorta azkoitiarrak entrenatzen duen Bolivia izatea aurrean, duela 19 urte (1993an) gertatu zen moduan. Anoetan jokatu zen partidu hartan, euskaldunak nagusitu ziren, orduan ere Azkargortak entrenatzen zuen taldearen aurka. Julio Salinas (2 gol) eta Julen Guerrerok sartutako golei esker (3-1).
Traje berriarekin
Aurten, bestalde, traje berria estreinatuko du Euskal Selekzioak. Dotorea, modernoa eta berezia, Kukuxumusurekin elkarlanean egin baitu Import Arrasate etxeak (Astore markaren enpresa arrasatearra). Atzo aurkeztu zuten Anoetan eta han izan ziren, beste batzuen artean, Arrasateko enpresako zuzendari nagusi Jesus Anduaga eta beste arrastear bat, Realeko kapitain Mikel Gonzalez.
"Oso polita"
Mikel Gonzalezi asko gustatu zaio ekipamendu berria eta nabarmendu du, batetik, bere herriko etxe batek egindakoa dela eta, bestetik, igartzen dela Kukuxumusuren eskua.
