Kooperatiba-proiektu berri horri esker, "Euskal Herriko bigarren finantza-entitatea eta Estatuko bigarren kreditu-kooperatiba" izango direla esan dute arduradunek.
Kooperatiba berriak 2/2012 eta 18/2012 Errege Dekretuek zehazten dituzten betebehar guztiak beteko ditu. Kapital printzipalaren maila % 10etik gorakoa izango da; beraz, likidezia-betebeharrak betetzeaz gain, estaldura-fondo orokor "nabarmena" sortuko du.
Kooperatiba-proiektua helburu jakin batzuk lortzeko sortu da. Horren barruan, "kooperatibismoaren balio eta printzipioetan oinarritutako banku-eredua sustatzeko konpromiso irmoa" eta "ekonomia suspertzen lagunduko duen eragile aktibo" izateko bokazioa berretsi dituzte arduradunek.
Martxoan hasi zen
Aurtengo martxoan integrazio-prozesuaren inguruko elkarrizketa formalei ekin zitzaiela jakinarazi ondoren, hasierako egutegia zehatz-mehatz bete da.
Ekainaren 30ean, bi entitateetako Batzar Nagusiek beren Kontseilu Errektoreek aurkeztutako integrazio-proposamenak ontzat eman zituzten. Gero, urrian, erakunde eskudun guztiek integrazioa onartu zuten; eta gaur, urriak 31, integrazioaren eskritura publikoa sinatu da.
Ondoren, dagozkion izapideak egiteko eta erregistroetan inskribatzeko urratsak egingo dira.
Aurreikuspenen arabera, erabateko integrazio operatiboa 2013ko ekitaldian zehar egingo da.