Estudioaren sekretupean daukate guztia gordea eta aurrerapen gutxi eskaini dute momentuz. Hirugarren diskoa izango dela jakina da – Biluztu (MusikHerria, 2005) eta Sedukzioaz (MusikHerria, 2009) luzeen ostean – eta iragarri dute Hirugarren azala izango duela izena. Bonberenea Ekintzarekin kaleratuko dute, onbidean, azaroaren 22an lana. Hori bakarrik ez, Hirugarren azalak izan duen azala ere erakutsi dute, hain zuzen.
Gainontzeko guztia ondo gordeta daukate momentuz. Azken asteetan ibili dira lan berria grabatzen Oiartzungo (Gipuzkoa) Portugal Txiki estudioan Josema Linazasoro teknikariarekin. Hirugarren azala lanak “irudiaren, simulaketaren eta espektakuluaren jendartea" du jomuga eta "guztia errealitatea baino errealagoa den hirugarren azal horretako bizimoduaz” dihardu, MusikaZuzenean.com webgunean ireki berri duten blogean azaldu dutenez.