Lau gune lehenetsi ditu Udalak eta horretarako 115.000 euroko aurrekontu erreserba dagoela jakinarazi du. Lehen gunea da erlojuaren eraikinaren aurrealdea; eremu horrek erabilera intentsiboa du, are gehiago San Isidro zubia itxita dagoenetik. Beraz, zirkulazioan nahasmena ekiditeko, zubia ireki ostean egingo dira lanak. Udalaren arabera, denbora laburrean egin daiteke.
Bigarren puntua da Oltametik –Zalduspe– Osinagako zubiraino doana. Udaleko zerbitzu teknikoek aholkatu dute lanok orain edo datorren urteko lehen ekinaldian egitea.
Hirugarrenak, berriz, Garibaiko bus geltokia hobetzea du helburu; lan konplexua da, besteak beste, arekak –kanalak– egin behar direlako.
Azkenik, lehentasunezkoa da ere ospitale aurrealdea asfaltatzea. Hala ere, bertarako hirigintza plana aprobetxatzea aurreikusten du Udalak.