Alkoholismoa sufritzen duenari zulotik ateratzen laguntzeko Alkoholiko Anonimoen taldea dagoen moduan, gaixoaren familiak eta lagunek ere badaukate beraien taldea. Arrasaten duela 38 urte hasi zen Al-Anon-Alateen taldearen baitako Udalaitz Taldea egiteko horretan. Ez da erraza etxean edo lagunartean alkoholismoa duen norbait edukitzea; moduren batean edo bestean eragiten die guztiei egoerak, heldu zein haurrei. Eta ez da erraza, Udalaitz Taldeko lagunaren esanetan, horren gainean zabal berba egitea.
Hamabi lagun taldean
Eguenetan elkartzen dira Arrasate Pasealekuko lokalean. Euren esperientziak kontatzen dizkiote elkarri, egoera zehatzen aurrean nola jokatu konpartitu. Barneak askatzeko modu bat. Gaur egun hamabi lagunek osatzen dute Udalaitz Taldea; emakume eta gizonak, herri ezberdinetakoak gainera. Izan ere, zenbaitek horrelako talde batetan parte hartu gura bai, baina nahiago izaten dute beraien udalerrietatik kanpo egin Udalaitzeko lagunen esanetan.
Helduak dira hamabi lagun horiek: "Alateen taldera joan behar dira gazteak, Donostiara. Hau, seme-alabentzako laguntza taldea da. Orain dela zenbait urte Arrasaten ere egon zen, baina jende gutxi etortzen zenez, azkenean Donostiara bideratu zen zerbitzua".
Aldaketa nabarmenak
Duela 38 urte taldea funtzionamenduan hasi zenean, gauzak modu sekretuan eramaten zirela adierazi digu taldekideak. "Lehen etxean geratzen ziren arazo horiek, eta gaur egun zorionez, onartu eta aurpegia ematen duzu, eta benetan lagungarria da". Alkoholismoaren arazoa uste baino zabalduagoa dagoela adierazi digu: "Eta geroz eta gazte gehiagok sufritzen dute, gainera".
Hala, informazio gehiago edo laguntza behar dutenek, elkarteko ateak irekita dituztela gogorarazi du.