Azkenaldian izen handia hartu duen taldea da Irungo Lisabö. Horren adierazle da azkeneko urtean Espainiako musika aldizkari askotan portada izan direla. Bada, Kooltur ekintza taldekoek Lisabö aukeratu dute Kooltur ostegunen hirugarren denboraldia hasteko. Beti bezala, Maritxu Kajoi bezperan, eta beti bezala, indartsu hasiko dute denboraldia.
Formatuari eutsiko diote
Kooltur ostegunak ekimenak ibilbide laburra duen arren dagoeneko erreferente bilakatu da inguruko musika zale eta musikarien artean. Formatu berezia da: eguenetan, talde bakarra eta kontzertu motza. Bada, formatuari eutsi egingo diote aurten ere.
Urriko agenda lotuta dute
Dagoeneko urriko agenda lotuta dute Kooltur ekintza taldekoek. Bertako eta kanpoko taldeak, eta ezagunak eta ez hain ezagunak direnak pasako dira Arrasateko gaztetxetik.