Etxeko taldeak agindu zuen ia partidu osoan zehar. Arrasatearrak izan ziren erritmoa jarri zutenak, eta markagailuan uneoro joan ziren aurretik. Fisikoki talde indartsuagoa da Askartza Claret baina Josu Larreategiren mutilak azkarrago eta eraginkorrago jokatu zuten.
Hamar puntuko aldea izan arren, Eskoriatzako entrenatzaileak behin baino gehiagotan errepikatu behar izan zien jokalariei lasaiago jokatzeko: "Ikusi nola dagoen markagailua". Orduan igartzen da esperientzia falta; Askartzakoak atzetik joan arren ez zuten burua galdu eta partiduan izan ziren uneoro: "Talde ona da, esperientziaduna. Ziur sailkapeneko goiko postuetan ibiliko direla. Etxean irabaztea lortu dugu, baina ezin gara erlaxatu; halako lehiak irabazteko oso ondo egin behar dugu lan", zioen Larreategik partiduaren amaieran.
Kanpokoen erreakzioa
Laurden guztietan izan ziren garaile arrasatearrak, azken laurdenean izan ezik: 19-16/ 18-15/ 20-18/ 9-17. Zonako defentsara aldatu izana izan zen kanpokoen erreakzioaren gako nagusia, arrasatearren erasoko zenbait huts egiterekin batera. Partiduko azken segundoetan lortu zuten kanpokoek berdinketa, eta luzapenera joan behar izan ziren bi taldeak, arauzko denboran 66-66na berdindu zuten-eta.
Fisikoki hobeto heldu ziren leioarrak, eta hori igarri zen luzapenean. MU Mikel Arejolaleibaren hiruko eder batekin hasi bazen ere, luzapeneko bost minutuetan gehiago izan ziren kanpokoak. Hala ere, Arejo-ren azken saskiratzeek garaipena eman zioten MU-ri. Emozioa barra-barra, benetako saskibaloia.