"Lau begirada argi eta zorrotz, hizkuntza komunitate bezala non gauden eta norantz goazen hausnartzen laguntzeko. Biziko bagara jantzi beharra daukagulako euskaldunok". Halaxe dio AED elkarteak.
- Lorea Agirre kazetari eta Huheziko Sorguneak taldeko kidea izango da lehena hitza hartzen iraileko berbaldian, irailaren 25ean, martitzenez. Nor izateko izenburupean jardungo du.
- Pako Aristik urrian eskainiko du hitzaldia. 23an, hau ere martitzena. Euskara, hizkuntza bat bere bakardadean izenburupean.
- Jon Sarasuari azaroan helduko zaio txanda. Norabideari buruz dozena bat gogoeta egingo du aretxabaletarrak. Azaroaren 28an izango da, eguaztenean.
- Berbaldi zikloari Kike Amonarrizek emango dio amaiera abenduan, 13an, eguenean. Tolosarraren hitzaldiaren izenburua: XXI. mendeko euskaldunak. Nola ari diren aldatzen gauzak, kamarada.
Lau hitzaldiak Goiena telebistak jasoko ditu eta streaming bidez, zuzenean, emango dira Goiena.net webgunearen bitartez. Goiena telebistan ere emango dituzte.
Saio guztiak irekiak izango dira euskararen eta euskaldunon komunitatearen inguruan interesa duten guztientzat. Doan.