Atez ateko zabor bilketaren aukako plataformek irailaren 6an egindako bileran, 6.686 sinaduraren babesa zutela esan zuten eta zabor kudeaketaren inguruan herri galdeketa bat eskatu zioten Azkarragaurizarri. Alkateak galdeketa atez ateko sistema ezarri eta bi urtera egiteko asmoa dutela esan zien, baina bi plataformen ordezkariek, galdeketa hori beranduegi izango dela uste dute.
Arrasate Garbi eta Stop PaP plataformetako kideek zabor bilketa sistema berria ezarri ondoren, Udalak planteatutako galdeketaren emaitzak ez duela balio uste dute. Izan ere, sistema berria ezartzen diru asko gastatu ostean atez atekoa kenduko ez dutela uste dute eta atez atekoaren ezarreraren azterketa ekonomikoa eskatu zien.
Zabor bilketaren aurkako bi plataformen kideak 5. edukiontziaren aldeko apustua berretsi dute eta birziklapena kontzientziazio, hezkuntza eta errespetu arazo dela uste dute.
Debagoieneko beste herri batzuekin elkarlana egin nahi
Nahiz eta udalaren ezezkoa jaso, Arrasate Garbi eta Stop PaP plataformetako kideak atez atekoaren aurka lanean jarraituko dutela esan dute eta Debagoieneko plataforma bat sortzekotan daudela adierazi dute. Bertan, Debagoienean atez atekoaren aurkako erantzun bateratu bat emateko, sistema honen aurka dauden eskualdeko dauden elkarte eta pertsonekin elkarlana sustatu nahi dute.