Astelehenean ez zenuen halako berririk espero.
Ez, egia esan harritu egin nintzen, ez nuen halakorik espero. Ez nuen uste Amets Txurruka ere kanpoan geratuko zenik, eta begira... Gauzak, baina, datozen moduan hartu behar dira, eta dagoeneko talde bila hasi gara.
Asteazkenean zuek biok izan zineten albiste, baina beste taldekide asko daude egoera berean.
Bai. Nik ia egunero Txurrurekin entrenatzen dut, eta gu bion egoeraren berri dakit. Besteei ez dakit zer esan dieten.
Askotan aldaketak gomendagarriak izaten dira.
Beno, beste talderen baten deia jasotzen badut seguruenik lekuz aldatzea ondo etorriko zait. Arazoa izango da beste talderen batean lekurik aurkitzen ez badut. Pena izango litzateke txirrindularitza utzi behar izatea.
Zelan dago merkatua?
Apur bat berandu gabiltza. Jendea Tourraren ostean hasten da datorren denboraldira begira gauzak begiratzen, edo Vueltan zehar, bestela. Egia da talde asko osatuta daudela datorren denboraldira begira.
Egunotan ez duzue eskaintzarik jaso?
Ez, oraindik ez.
Sare sozialetan ikusi dugu jendeak ez dituela erabaki horiek ondo hartu.
Beno, garbi dagoena da filosofiaz aldatuko dutela. Lehen Madariaga zegoen taldeburu, eta orain Igor Gonzalez de Galdeano dago, eta berea da erabakia. Ikusteko dago jendeak zelan erantzuten duen, baina ez dut uste zaleak pozik daudenik.
Astelehenean bertan saioan adierazi genuen, taldearendako lanean ibili eta punturik batu ez duzuenok, interes propiorik izan ez duzuenok, zigortuak izango zaretela sistema honekin.
Bai, hori da. Azkenean puntuen kontu honekin etorkizuneko txirrindularitzan bakoitzak berea egingo du, eta ez da benetako talde-lanik egongo. Kirol indibidualagoa bilakatuko da.
Denboraldi amaiera honetan, lehengo asmoekin jarraitzen duzu.
Bai, bai. Abendura arte kontratua dut Euskaltelekin. Lonbaria eta Piamonte egingo ditut, eta ondoren Txinara joango gara denboraldia amaitzera.