Gai-zerrenda mardula du esku artean gaur Arrasateko Udal Gobernuak. Bestelakoen artean, Lurraldebusen proposamena izango dute mahai-gainean: BEZaren igoerak eraginda, herri barruko urbanoaren prezioen igoera proposatzen du, hain zuzen ere.
Erlojuaren Eraikineko proiektuak
Erlojuaren Eraikinari dagokionez, berriz, bertan "dauden edo egon litezkeen jardueren proiektua idazteko zerbitzua emateko, prozedura negoziatua agindu behar duten administrazio baldintzen eta baldintza teknikoen agiriak onartzea" izango dute aztergai.
Zorrak eta linea elektrikoa
Horrekin batera, hainbat zor dituzten jarduerei ur zerbitzua mozteko proposamena aztertuko dute gobernuko kideek.
Udalerria zeharkatzen duen tentsio altuko linearen segurtasuna handitzeko herriko zenbait zuhaiztitan obrak egiteko baimena ere esku artean izango dute. Eta beste pare bat gai aipatzearren, 2012ko Guraso Tailerrak, irailetik abendura bitarteko Emakume Txokoaren plangintza eta Jabetze Eskola, eta Berdintasun Sailaren dirulaguntzak landuko dituzte.
Betiko moduan, batzarra 16:00etan hasiko da.