Herriko eragile ugarik hartu dute ekimena antolatzeko ardura: Arrasateko Udala, euskalgintzako zenbait talde, Arrasate Atletiko taldea...Euskararen aldeko ekitaldia da eta Euskal Herri osoan zehar ordu berean egingo diren lasterketen bidez, milaka pertsonen inplikazioa bilatzen du.
Lagun arteko lasterketa honek ez du lehiaketa bultzatzen, xedea euskaraz bizi nahi dela aldarrikatzea baita. Hala, zozketa batetan sartuko dira parte hartzaile guztiak eta sari ezberdinak irabazteko aukera edukiko dute: DVD eramangarri bat, xurgagailu elektronikoa, motxila...
Adinaren arabera lasterketa maila ezberdinak egingo dira:
- 5-6 urtekoek 100 metro
- 7-8 urtekoek 175 metro
- 9-10 urtekoek 400 metro
- 11-12 urtekoek 600 metro
- 13-14 urtekoek 800 metro
- 15-17 urtekoek 1000 metro
- 18 urtetik gorakoek 5000 metro
Internet bidez egin daiteke aurretik izen-ematea, baina egunean bertan eta hitzordua baino ordubete lehenago ere egongo da aukera. Lasterketan aritu nahi dutenek prezio sinboliko bat ordaindu beharko dute: haurreko 2 euro eta helduek 5 euro. Online bidezko inskripzioa eginez gero, ordainagiria aurkeztu beharko da lasterketa aurretik, izena emateko mahaian.