Mendizale gehienak euren kabuz joango dira Besaidera, baina Arrasateko mendi elkartekoen proposamena da Besaidera Arrasateko bide zaharretatik joatea: "Domekan 08:30ean egin dugu hitzordua, Monterronen, eta deialdi irekia da, Arrasateko bide zaharrak ezagutu nahi duenarendako proposamena", adierazi digu aste barruan Aitor Zubiaga Besaideko ordezkariak: "Meatzerrekatik gora egingo dugu, Salturriko baserritik pasa eta Txukurrilloko bidetik Labasturrera, handik Besaidera jaisteko". Hain zuzen, Besaidek eskuartean dituen proiektuetako bat da Arrasate inguruetako bide zaharrak errekuperatzea, eta ekimen honekin bide horietako batzuk ezagutarazi nahi dituzte.
Besaiden, 10:30ean
Oroimen Eguneko egitarauari dagokionez, txistulari eta txalapartariek ongietorria egingo diete mendizaleei 10:30ak aldera. 11:00etan meza egingo dute, eta ondoren dantzari eta txistulariak izango dira. Txosna ere jarriko dute, jateko eta edatekoekin.