Astebete falta arren, komeni da Mugikortasun Asteko zenbait ekitaldi agendan apuntatzea ahalik eta lasterren. Birzikleta Azoka da horietako bat. Izan ere, azoka bera irailaren 22an (zapatua) izango bada ere, azokarako materiala oraingo zapatuan, irailaren 15, eta hurrengo martitzen eta eguenean, irailaren 18 eta irailaren 20, eraman beharko da, Udal azokara. Zapatuan, 11:00etatik 13:00etara, eta martitzen eta eguenean goizez ordu berean eta arratsaldez 17:00etatik 19:00etara.
Ze material
Edozein motako bizikletak, patinak, patineteak, kaskoak, belozimetroak, gurpilak, eskularruak, mailotak… eraman ahal dira, jakina, egoera onean baldin badaude.
Gero, azokan saltzen ez duten materiala eta saldutakoaren zenbatekoa jabeari emango dizkiote irailaren 27an, eguena, Udal azokan. 17:00etatik 19:00etara.
Gidatze iraunkorra, izenematea
Gidatzearen gaineko ikastaroari dagokionez, berriz, hori ere irailaren 22an izango da, Jokin Zaitegi aretoan. Baina interesa duenak aldez aurretik eman beharko du izena, irailaren 19a baino lehen, hain justu ere (BAZen). Ikastaroan erakutsiko dute zela "gidatzeko era eraginkorrak erakusten digun irizpideak aplikatuz lor dezakegun erregaien kontsumoa %20 gutxitzea".
Autobusa doan, poltsak opari
Eta Mugikortasun Astearen beste pare bat ekitaldi aipatzearren, Arrasateko urbanoa doan erabili ahal izango da aste berdeak irauten duen bitartean. Eta Ibai-Arte merkatari elkarteko kide diren saltoki guztietan, berriz, poltsa berrerabilgarriak banatuko dituzte irailaren 17an hasi eta poltsak agortu arte.
Horrez gainera, Ibai-Artek elkarteko saltokien erakusleihoak "iraunkortasun irizpideekin apaintzera" animatuko ditu, "berrerabilitako materialak erabiltzen, dendetan dituzten produktu ekologikoak erakutsiz…"