Uribetxeberria "lehenbailehen" askatzeko eskatu dute arrasatearrek

Josu Uribetxeberria baldintzapean aske uztea erabaki du Espainiako Auzitegi Nazionaleko José Luis de Castro epaileak. Uribetxeberriaren abokatuak azaldu du helegiterik ez dagoen artean berehala bete behar dela ebazpena, eta horixe eskatu diote Espetxe Zaintzari. Arantza Aparicio abokatuak uste du ebazpena berehala indarrean ez jartzea "legez kanpokoa" dela eta "ebazpena berehala aplikatu behar" dela esan du. Auzitegiaren ebazpenari errekurtsoak jar dakizkioke oraindik. AVTk Fiskaltzari eskatu dio "bide guztiak erabiliz" saia dadila Uribetxeberria kartzelan mantentzen. Atzo, egubakoitza, Uribetxeberria "lehenbailehen" askatzea eskatzeko manifestazioa egin zuten ehundaka lagunek Arrasaten. Gaur, zapatua, gaixo larri dauden euskal presoak askatzea eskatzeko manifestazioa egingo da Donostian, 17:30ean Antiguako tuneletik abiatuta.

• Uribetxeberria aske utziko dute
• Arrasateko alkatea: "Espainiar justiziak, justua izatekotan, berehala aske utzi beharko lituzke Josu eta beste 13 gaixo larriak"
• Manifestazioa deitu dute zapaturako Donostian, gaixo dauden presoen alde
• Josu Uribetxeberriaren inguruko testigantzak dokumental batean