"Abuztuan harri-lubetak egiten segituko dugu. Hodiak… pasatu behar dira eta lan handia da. Abuztu ostera arte ezin izango gara eraikitze lanekin hasi", kontatu dute bertako langileek.
Bien bitartean, makinaz eta kamioiez beteta dago Musakolako sarrera. Hautsez eta zarataz beteta, inguruko bizilagunen zoritxarrerako. Eta hori bai, erretiratuen gozamenerako. Goizean goizetik dituzte "ikuskatzaileak" obretako langileek.
Baina era berean, makina guzti horiei esker, lanak bide onetik doaz; momentuz, behintzat, aurreikusitako epeak errespetatuz eta "akaso aurretik" ere bai. "Esan digute gura dutela Gabonetarako bukatuta egotea", ekarri dute gogora langileek.
Kontuak kontu, oraindik ere arraro egiten da Arrasateko sarrerako errepidea zirkulazio barik dagoela eta hondakinen behin-behineko biltegi moduan darabiltela ikustea.