Txapel urdina jantzi, begiraleen esanei kasu egin eta nahi adina jolastu. Horixe izango da datozen egunotan etxeko txikitxoenen lana. Gustura asko aurkitu ditugu zeregin horretan gaur goizean, taldeka eta guneka banatuta herriko hainbat puntutan.
Azken batean, udalekuon helburu nagusiak dira, "txikienekin emozio-lanketa batez ere, eta nagusiekin parte-hartzea bultzatu". Horrekin batera, "euskararen helburu beti hor dago eta kalean umeen presentzia normalizatu" gura dute eta azken hori bultzatze aldera, kalean egin gura dituzte ekimen gehienak. Horrez guztiaz gainera, neska-mutikoen arteko harremanak bultzatu gura ditu Txatxilipurdi elkarteak, "eskola-ikastolako taldeak apurtuaz, ikusi dezaten beste ume batzuk ere badaudela".
