"Sei urteko zigorra gizon bati, bi umeri sexu-gehiegikeriak egiteagatik eta 1.260 euroko isuna, 10 urteko neskato bat bortxatzen saiatzeagatik eta emakume bat iraintzeagatik"; "Andre bat erietxera eraman dute, bikotekide ohiak eraso egin ostean Trapagaranen";… gaur goizeko berriak dira biak ala biak, ez dago atzera egin beharrik halako gertaerekin topo egiteko. Eta hala erakusten dute Auzitegi Medikuntzako Euskal Erakundearen azken datuek ere, salbuespenezko albiste izatetik errutinaren parte izatera pasa direla: familiarteko eta emakumeen aurkako indarkeriak hazi egin dira Euskal Autonomia Erkidegoan.
Gipuzkoara etorrita, 338 genero indarkeria kasu eman ziren iaz, eta izaera psikologikoko 367; eraso psikologikoak fisikoak baino gehiago izan ziren, beraz.
"Inor ez gaude horrelakoetatik salbu"
"Inor ez gaude horrelakoetatik salbu eta Arrasate eta Debagoiena ez dira salbuespenak", Arrasateko Emakume Txokoko Maite Barreñaren esanetan. Horri aurre egitea gizarte osoaren egitekoa da Barreñaren ustez eta, beraz, denok, bakoitzak dagokion tokitik eta ahal duen heinean eragin behar dugula dio, eta baita ondorengo belaunaldiei begira lan garrantzitsua egin behar dugula ere.