Hotel Mondragonen aurrean egin zuten aurreneko geldialdia 250 neska-mutikoek, guztiek batera jotzeko. Bien bitartean, txikitxoenek karrozatik botatzen zituzten gozokiek bat egiten zuten zerutik jausten zen euri langarrarekin, ume eta nagusi askoren gozamenerako. Hala ere, gozamenik handiena danborrada adi-adi begiratzen zuten gurasoen artean atzematen zen.
Jendez gainezka zegoen Garibai etorbiderantz egin zuten gero, handik Maalarako bidea hartu eta Maalan bigarren geldialdia egiteko. Kantuak jo, ur apur bat edan, eta tradizioak agintzen duen moduan, Herriko plazan bukatu zuten aurtengo jarduna herriko txikitxoenek.
Eurek egin dute egin beharrekoa, orain nagusiei pasa diete lekukoa.