Tailer musikaleko 5 eta 7 urte bitarteko gaztetxoak igo ziren lehendabizi taula gainera. Musikaz lagunduta, hiru dantza eskaini zituzten: Krebspalka austiarra, Dunkerkeko karrilloiak belgikarra eta Indo Eu herrikoia.
Ondoren, Musikalak taldeak Hertzainak taldearen Aitormena abestia interpretatu zuten, pianoz, gitarraz eta perkusioz lagunduta.
Biolin talde txikiak lau abesti herrikoi eskaini zituen: Un elefante, Reel Sheila Nelson, Oh when the saints eta Rock rock bubly jock.
Junior's taldean musika tresna asko ikusi eta entzun ahal izan genituen: akordeoiak, biolinak, oboea, flautak, perkusioa, tronboia, tronpa, fagota, pianoa, gitarra elektrikoa eta ahotsa. Horiek guztiek bat eginda Arrasateko Deskontrol taldearen Duintasunez eutsi abestia eskaini zuten.
Amaiatzeko, ballet taldeak zazpi dantza ezberdin egin zituen: Arco iris, Haditas, Sintiendo las olas te hará mover, La selva, Alma, Tu me mimas yo te mimo eta Adios.
600 matrikula
Ikasturte honen balorazio positiboa egin digute Arrasate Musikaleko ordezkariek. 600 bat matrikula izan dituzte bukatu berri den ikasturte honetan eta 90 bat ekintza antolatu dituzte urte guztian.
Hurrengo kurtsorako matrikulatzeko epea atzo, egubakoitza, bukatu zen eta matrikulek pixka bat behera egin dutela aitortu diguten arren, datoren ikasturtean ere ikasle asko izango dituztelako pozik daude.
Egubakoitzeko kontzertua izan zen ikasturte amaierako kontzertu handia, baina oraindik datozen egunetarako beste zenbait ekintza ere badituzte Arrasate Musikalekoek antatuta. Adi, beraz.