"Errementari Dantzako entseguarekin hasiko gara, horren ostean erraldoien entsegua egingo dugu bandarekin, eta gero txikitxoenek entseatuko dute, gatieroekin. Arratsaldean, berriz, txosna ipiniko dugu", kontatu du Joserra Perezek, konpartsako kideak.
San Juan bezperan, San Juan egunean eta 26an
Xehetasunetan sartuta, Errementari Dantzarena entsegu orokorra izango da, San Juan bezperan egingo dutenaren aurrekari (ekainaren 23, 21:00etan).
Erraldoi handi, ertain eta txikein entseguei dagokienez, berriz, San Juan egunean dute agerraldietako bat (11:00etan), eta ordurako Estudiantina edo Jota Vieja de Sanguesa izeneko dantza entseatuko dute. Bestalde, ekainaren 26an dute beste hitzordua, baina "laneguna denez, ez dakit atera ahal izango garen", adierazi du Perezek. Izan ere, azken urteotan moduan, estu samar dabiltza konpartsako nagusienak, erraldoiekin ibiltzeko jende faltan.
Txosna
Bukatzeko, txosnari dagokionez, 18:00etan zabalduko dute, Seberren. Saiheskia, garagardoa eta konpartsako materiala salduko dute, eta 21:00etan, bildotsa zozkatuko dute. "Helburua da diru apurtxo bat lortzea, konartsarendako, mantenu lanak egiteko", adierazi du Joserra Perezek.