2011ko Nafarroaren Egunerako prestatutako ekitaldia da Arrasaten egubakoitzean taularatuko dutena, Hitzen Musikaz Hazi izenekoa: "Kantaldi hunkigarri eta ederra izan zen, eta hainbeste jenderen artean eginiko elkarlan musikalak arrakasta handia lortu zuen. Entzuleriaren erantzun beroa eta kontzertuaren prestaketan burututako lan handia aintzat hartuta, ikuskizun hau Euskal Herriko beste txokoetara eramateko erabakia hartu genuen, lekuan lekuko haur koroarekin elkarlanean arituz".
Orkestra, Amaren Alabak, gaiteroak
Hain justu, Baigorriko elizan estreinatu zuten ekimena eta orain Arrasaten ikusteko aukera izango dugu. Hemengo kontzertuari dagokionez, Arrasateko Goikobaluko kantari txiki zein gazteekin eta Eñaut Elorrietarekin batera, beste honako hauek ere jardungo dute taula gainean: Et Incarnatus orkestra, Amaren Alabak, Baigorriko gaiteroak eta Juantxo Zeberiok.
… eta ikus-entzuleak
Eta haiekin guztiekin batera, herritarrei ere dei egin diete: "Abesti berri nahiz zaharretan publikoaren partaidetza eta protagonismoa funtsezkoa dela euskal kulturaren ezaugarri hain esanguratsua izan den kantatzeko ohitura onak ez galtzeko esperantzarekin, guztien artean arrats ahaztezina sortu eta gozatzeko".