Arrasateko mutilek lehenengo bi partiduetan ez zuten zorte handirik izan; arratsaldeko lehenengo lehia jokatzea tokatu zitzaien Igor Isasiren mutilei, zer eta Bera Berako talde indartsuaren kontra –ohorezko mailan jokatzen dute.
Hala, partiduko lehenengo minutuetan kontrarioari eusteko gauza izan baziren ere, minutuek aurrera egin ahala errealitatea nagusitu zen, askoz gehiago zen Bera Bera (45-0).
Ondoren etorri ziren gainontzeko partiduak. Frantziatik inongo ordezkaririk etorri ez izanak gatz apur bat kendu zion torneoari, baina gainontzeko taldeak arduratu ziren hutsune hori betetzeaz. Hala, Getxo eta Bera Bera iritsi ziren finalera, eta azken horiek gailendu ziren (45-7).
Hori baino lehenago, eta arratsaldeko lehenengo bi partiduak galdu ostean, Arrasate amorratuta zelairatu zen hirugarrena lehiatzeko asmoz, eta Gaztedik ordaindu zuen amorru hori, 50-0 nagusitu ziren-eta arrasatearrak.
Emakumezkoetan hiru talde lehiatu ziren, Getxo, Uribealdea eta Hernani. Euren artean lehia parekatuak izan ziren. Hala, bizkaitarrek 15-12 irabazi zioten Hernaniri, eta 20-16 Getxori.