Aldundiak bere garaian bidalitako zirriborro horretan biribilgune txiki bat jasotzen zen Bedoñarako bidea, umezaintzara doan bidea, Arrasateko herrigunera doana eta Aretxabaletara doan errepidea lotuko lituzkeena. Proiektu hori ontzat eman zuen Tokiko Gobernu batzarrak iazko maiatzaren 9an, eta Aldundiko Errepideetako zuzendaritzari proiektua "ahalik eta azkarren" garatzen hasteko eskatu zion.
Azalera irabazi beharra
Egun gunea dagoen moduan egonda, ez dago biribilgunea egiteko azalera nahikorik. Omer Arregi Hirigintza zinegotziaren arabera, biribilgunea egiteko beharrezkoa den azalera hori irabazteko Fagor Arrasateren lur zati txiki bat hartu behar da eta errepidearen mailan jarri, erlaitz baten bidez.