Prentsa agerraldian, Inazio Azkarragaurizar alkateak hartu du hitza: "Gatazka betiko konpondu eta haren ondorio guztiei irtenbidea emateko, ezinbestekoa da preso eta iheslarien egoera ere konpontzea", adierazi du, besteak beste.
Eta honakoa ere gaineratu du: "Urtarrilaren 7ko herri mobilizazio orokorra egin zenetik hona, alderdi politiko askok presoen auziarekiko jarrera berriak hartu dituzte. Hori guztia kontuan hartuz, begi bistakoa da egungo kartzela-politikak ez duela sostengu politiko eta sozialik".
Hainbat eskaera egin ditu Azkarragaurizarrek, hala nola, zigorraren bi herenak zein hiru laurdenak dituzten presoak kaleratzea eta gaixotasun larriak dituztenak askatzea. Azken horien artean, aipamen berezia egin dio Iosu Uribetxeberria preso arrasatearrari.
Plaza, zazpi orduz beteta
Honakoa da egitaraua:
11:00: Herriko hainbat monitoreren eskutik umeentzako jolasak. Gaztetxekoen eskutik tailerrak.
12:00: Herri krosa, herriko hainbat kirolarik antolatuta. Lau kilometroko ibilbidea herrian barrena.
13:00: Konzentrazioa Herriko plazan
14:30: Herri bazkaria, herriko elkarte gastronomikoetako kideek prestatuta
16:00etatik aurrera: Herriko hainbat eragile kulturalen emanaldiak (bertso eskola, dantza taldeak, musikari eta bakarlariak, trikitilariak…)